Fylltar kjúklingabringur

Ég er búin að vera að fikra mig áfram með þessa uppskrift. Mér datt fyrst í hug að nota gráðost í hana, en þegar til kom að prófa hugmyndina átti ég hann ekki til og nennti ekki út í búð eftir honum og greip í staðinn bita af Pecorino Romano-osti. Pecorino Romano er ítalskur sauðaostur sem minnir á Parmigiano-Reggiano-ost (Parmesan), og reyndar má nota hann í staðinn fyrir Pecorino. Þetta reyndist snilldarráð og þegar ég prófaði uppskriftina svo seinna með gráðosti þá ákvað ég að hún væri betri með Pecorino en gráðostinum.

Fyrir tvo.

2 kjúklingabringur
--
8-10 döðlur, ferskar eða þurrkaðar, steinlausar, saxaðar í litla bita (það er auðveldara að saxa þær ef þær eru þurrkaðar)
2 msk fínrifinn Pecorino Romano eða Parmesan ostur
6 litlar eða 4 stórar ræmur af beikoni, hverri skipt í 8 (litlar) eða 12 (stórar) bita
--
1 msk fínrifinn Pecorino Romano eða Parmesan ostur
2 ræmur af beikoni, heilar (eða skipt í tvennt ef þær eru stórar)
--
kjúklingakrydd
salt og pipar
--
ca. 1 dl. hvítvín (þurrt eða hálfþurrt) EÐA vatn EÐA kjúklingasoð
--
trétannstönglar eða mjóir grillpinnar (eða sláturgarn)

Stillið ofninn á 180°C (blástursofn) eða 190°C (undir- og yfirhiti).

Takið kjúklingabringurnar og skerið inn í þær frá hlið til að búa til "vasa" í þeim miðjum. Hafið vasana eins stóra og hægt er án þess að skera í gegn og hafið gatið eins lítið og hægt er. Hérna er mynd sem sýnir tæknina. Líka er hægt að "fletja" bringurnar með buffhamri og rúlla fyllingunni innan í þær, en mér finnst það óþarfa aukavinna.

Blandið saman döðlunum, ostinum og beikoninu (þarf ekki að vera mjög vel blandað). Skiptið í tvennt og troðið varlega inn í kjúklingabringurnar. Ef eitthvað gengur af þá er því stráð í kringum bringurnar í ofnfatinu. Lokið bringunum með tannstöngli eða grillpinna, eða saumið saman með sláturgarni.

Kryddið bringurnar í bak og fyrir með salti, pipar og kjúklingakryddi og leggið í smurt ofnfast fat. Stráið yfir þær rifnum osti og leggið beikonræmur yfir.

Stingið inn í ofninn og bakið í 40 mínútur. Mjög þykkar bringur gætu þurft 5 mínútur til viðbótar.

Berið fram með hrísgrjónum eða kúskús, og fersku salati. Gott að drekka hvítvín með.

Tilbrigði:

• virkar líka vel með skinku í stað beikons...
• ...eða þurrkuðum apríkósum í stað daðlna
• prófið aðra osta, t.d. ætla ég næst að prófa feta

Hvítbauna- og kartöflusúpa

Þessi súpa verður gullin á litinn en getur líka orðið grænleit eða jafnvel appelsínugul, allt eftir því hvaða blanda af grænmeti er notuð. Þetta er mín eigin uppskrift og ætti að duga tveimur í máltíð (með brauði) eða í forrétt fyrir 3-4. Þetta er svokölluð eldhúsvasks- eða ískápsuppskrift, því maður notar í hana það grænmeti sem maður á til.

Ég átti reyndar ekkert grænmeti þegar ég mallaði henni saman fyrst (uppgefin uppskrift) og mér þykir hún alltaf best þannig, en það er líka gott að bæta 1-2 söxuðum gulrótum við uppskriftina, sneiddum púrrulauk, sellerístöng í sneiðum, hnúðkáli í bitum og jafnvel saxaðri papriku. Bragðið breytist auðvitað svolítið eftir því hvaða  grænmeti er notað.

En sem sagt, hvítbaunasúpa a la moi, grunnuppskrift:


1 bréf beikon, hver sneið skorin í 5-6 bita, eða bréf af beikonkurli og 3-4 sneiðar af beikoni til skrauts, skornar eins og getur að framan
--
1/2 laukur, skorinn í tvennt og sneiddur þunnt
3-4 meðalstórar kartöflur, skrældar og skornar í 8 bita hver

 --
1 dós smjörbaunir eða hvítbaunir (cannelini), soðinu hellt frá og baunirnar skolaðar úr köldu vatni
1 lítri vatn
grænmetiskraftur eftir smekk
Aromat (ef vill, eykur fyllingu í bragðinu)
salt og pipar

Súpupottur hitaður og beikonið steikt í honum því þar til það er að verða gegnsteikt en ekki hart og fitan er farin að renna. Ef notað er kurl og sneiðar eru sneiðarnar teknar úr pottinum og lagðar til hliðar (það er ágætt að steikja þær heilar og klippa svo niður í pottinn þegar þar að kemur). Ef eftir er meiri fita en ca. 2 msk er umframfitunni hellt frá. Ef hún er minni er bætt við smá klípu af smjöri.

Laukurinn svissaður í fitunni þar til hann er glær og aðeins byrjaður að brúnast. Kartöflunum bætt út í og steiktar þar til þær byrja að brúnast á brúnunum. Vatnið sett út í ásamt baunum og grænmetiskrafti (gott að miða magnið á honum við 1/2 lítra af vatni miðað við leiðbeiningar á umbúðunum og bæta frekar meiru við undir lokin, því grænmetiskraftur er misjafnlega sterkur (og saltur)). Suðan látin koma upp og látið malla í 20 mínútur undir loki.

Að 20 mín liðnum er tekin ausa og veidd upp af botninum ausufylli af beikoni, kartöflum og baunum og tekið til hliðar. Þvínæst er afgangurinn af súpunni maukaður. Best er að nota töfrasprota og gera það beint í pottinum, en líka má hella henni í matvinnsluvél. Síðan er súpan sem tekin var til hliðar sett saman við aftur ásamt beikoninu sem var tekið til hliðar í upphafi. (Það má auðvitað mauka súpuna alla, en mér finnst hún a.m.k. meira spennandi og fallegri svona). Látið malla í 15 mínútur til viðbótar með lokið af.

Smakkað til með salti, pipar og Aromati. Flott að skreyta með einhverju grænu áður en er borið fram, t.d. graslauk eða steinselju, eða þá með fínt saxaðri rauðri eða grænni papriku. Gott með grófu brauði.

Heitir og sætir beikonvafðir kjúklingabitar

Smellið á myndina til að stækka hana

Ég smakkaði eitthvað svipað og þennan rétt í samkvæmi fyrir nokkru síðan en gleymdi að biðja um uppskrift. Það reyndist aftur á móti ekki erfitt að finna út úr uppskriftinni. Það eina sem ég breytti var að ég nota langtum minni chili-pipar en var í réttinum eins og ég smakkaði hann fyrst. (Ekki að mér þyki chili ekki gott eða þoli það ekki, mér finnst bara oftast betra að finna meira bragð af matnum en bara chili-bruna).

Þetta er flottur smáréttur til að bera fram t.d. í Júróvisjón-partýum eða saumaklúbbum, eða bara í sunnudagsmatinn þegar mann langar í eitthvað gott en nennir ekki að vera að hafa mikið fyrir matnum.

Þessi uppskrift dugir í aðalrétt fyrir einn eða sem forréttur fyrir 3 til 4.

1 kjúklingabringa
1 lítið bréf beikon
ca. 0,8 dl púðursykur (hellið honum í dl-málið og leyfið honum að síga niður í það undan eigin þunga. Ekki þjappa.)
1/4 tsk cayenne-piparduft (meira eða minna eftir smekk)
1/2 tsk salt
tannstönglar

Smellið á myndina til að stækka hana

Þerrið kjúklingabringuna og skerið niður í ca. 2 cm teninga. Teljið bitana og takið helmingi færri beikonsneiðar en kjúklingabita og skiptið í tvennt. Vefjið einni beikonræmu utan um hvern kjúklingabita og stingið tannstöngli í gegnum bitann til að halda beikoninu á sínum stað.

Blandið saman púðursykrinum, cayenne-piparnum og saltinu. Veltið kjúklinga-beikonbögglunum upp úr blöndunni (það gæti þurft að hjápla blöndunni til að loða við - bara þrýsta létt með puttunum) og raðið þeim á smurðan ofnrekka yfir smurðu ofnfati (t.d. lasagna-fati). Ef einhver sykurblanda er eftir er gott að strá henni jafnt yfir bitana.

Bakið við ca. 175 °C í 30-35 mínútur. Beikonið ætti að vera orðið vel brúnað og stökkt á köntunum og sykurinn bráðnaður.


Athugasemdir:

• Rétturinn stendur einn og óstuddur án sósu eða meðlætis. Ef hann á að vera aðalréttur mæli ég þó með að bera fram með honum tómatbáta og gott brauð (t.d. hvítlauksbrauð), og að draga tannstönglana úr bitunum áður en hann er borinn fram. 
• Ef hann er hafður mjög sterkur er gott að bera fram sýrðan rjóma með honum til að viðkvæmari gestir geti linað sviðann í munninum.
• Ef stækka á réttinn er rétt að bæta við ca. 1/2 dl af púðursykri fyrir hverja kjúklingabringu til viðbótar og smakka sig áfram með cayennpiparinn.

Franskt bóndasalat

Þetta er matarsalat sem hægt er að snæða sem létta máltíð eða í smærri skömmtum sem forrétt.

Matreiðslubók: Sælkerasafnið: Salatréttir


Fyrir 1-2.
Tími: ca. 15 mín.

Salat:
1-2 egg
1/4 haus of jöklasalati
1/4 haus af salatlaufum (ég notaði Lambhagasalt þegar ég tók myndirnar, en í bókinn er sýnt salat sem minnir á skrautsalat)
75 gr. saltað beikon, helst í þykkum stykkjum, ef ekki, þá beikonhakk
1 sneið franskbrauð

Sósa:
Salt og pipar
1/2 hvítlauksrif, pressað
2 tsk. edik (ég mæli með að nota hvítvínsedik eða eplaedik en ekki venjulegt)
1 msk. olía (ólífuolía)

Aðferð:
Blandið öllu sósuefninu vel saman og kælið.

Sjóðið eggin þannig að hvítan sé stíf en rauðan rétt byrjuð að soðna. Skerið í helminga eða fjórðunga rétt áður en rétturinn er borinn fram. Snyrtið og þvoið salatlaufin og rífið í bita (salatið er fallegra með stórum bitum, en það er auðveldara að borða það með litlum). Skerið beikonið í stóra bita og brauðið í teninga. Steikið beikonið þangað til það er byrjað að verða stökkt. Takið af pönnunni og brúnið brauðteningana stökka í beikonfeitinni.

Hellið smávegis af sósunni á hvern disk. Setjið blönduðu salatlaufin ofan á, því næst beikonið, síðan eggin og loks brauðteningana. Berið fram strax, með afganginn af sósunni til hliðar ef einhver vill meira.

Athugasemdir:

• Gott er að bæta skinkubitum við salatið.
• Samkvæmt myndinni í bókinni er gott að drekka bjór með réttinum.
• Betri blöndun á bragðþáttunum fæst með því að rífa salatlaufin fínt (ca. á stærð við frímerki) og húða með sósunni, hræra saman beikoninu og brauðteningunumn og setja ofan á salatið, og eggin síðast. En það er auðvitað ekki eins fallegt.