Einhvers konar beinlausir fuglar

Þetta er tvískipt uppskrift. Annars vegar er um að ræða hefðbunfna uppskrift að beinlausum fuglum, og hins vegar er kássa sem byggist á hefðbundnu uppskriftinni, að viðbættum sveppum og lauk.

Mér finnst kássan satt að segja betri en hefðbundna uppskriftin, fyrir utan að það er minna fyrir henni haft, þó auðvitað séu kjötbögglarnir flottir á diski.

Innihald í hefðbundinni uppskrift:
1,5 kg lambakjöt, nautakjöt eða hrossakjöt
50 g smjör
salt og pipar eftir smekk
5 dl vatn
100 g beikon
30 g hveiti

Hefðbundin tilreiðsla:
Skerið kjötið í þunnar sneiðar og stráið salti og pipar yfir báðar hliðar á hverri sneið. Leggið beikonræmu ofan á hverja sneið og rúlkið þétt upp. Bindið saman með sláturgarni.

Bræðið smjörið á pönnu og brúnið kjötbögglana. Bætið vatninu út á og sjóðið þar til kjötið er gegnsoðið (ca. 15 mínútur).  Takið kjötið af pönnunni og haldið heitu. Þykkið sósuna með hveitijafningi.

Berið fram með soðnum kartöflum eða kartöflumús, rabarbarasultu og gærnum baunum, eða þá með soðnum hrísgrjónum og salati.


Auðveldari aðferð með lauk og sveppum: 

Innihald í nýju uppskriftinni:
Allt sem er í þeirri gömlu, plús:
1 stór laukur, skorinn í tvennt og sneiddur í þunnar sneiðar
500 g sveppir, skornir í sneiðar
2-3 rif ferskur hvítlaukur eða 1-2 tsk hvítlauksduft
Season-All eða svipað krydd
(Aromat, ef vill)

Skerið kjötið í gúllasbita og brúnið á pönnu. Setjið í pott með vatninu og látið suðuna koma upp, lækkið þá hitann og látið malla.

Skerið beikonið í bita, steikið létt á pönnunni og setjið í pottinn með kjötinu.

Svissið laukinn á pönnunni þar til hann er glær og setjið í pottinn.

Mýkið sveppasneiðarnar í smjöri á pönnunni og setjið í pottinn.

Mallið þar til kjötið er meyrt og gegnsoðið. Smakkið til með kryddum og salti.

Nú er um tvennt að ræða: Annað hvort að hella soðinu frá og þykkja það með hveitijafningi (og ögn af rjóma) og bera fram með, eða þá að setja kjötið og sveppina í sósuna, eða bara sleppa því að þykkja soðið og hella öllu í skál og bera fram.

Ef meira vatn er notað er líka hægt að gera úr þessu súpu.

Einfalt tætt svínakjöt ("pulled pork")

Svona nota ég afgang af svínarifjasteik.

Mælt er með að nota svínahnakka í þennan rétt þegar hann er útbúinn frá grunni því að hann er hæfilega feitur til að kjötið verði ekki of þurrt. Í Bandaríkjunum er hefð fyrir að elda þennan rétt í hægsuðupotti (slow cooker, stundum nefndir Crock-Pot eftir algengasta vörumerkinu), en ég á ekki svoleiðis og nota því venjulegan pott og elda á lægsta hita.

Afgangi af svínarifjasteik (mínus pöru en með fitu) er skipt niður í hæfilega stóra bita til að kjötið  púslist sem best í botninn á þykkbotna potti. Vatni er hellt yfir þannig að fljóti yfir kjötið, bætt við 2-3 msk. af eplaediki og 1/4 til 1/3 bolla af barbekjú-sósu (BBQ) ásamt ögn af salti og söxuðum hvítlauk eða hvítlauksdufti. Suðan látin koma upp og látið malla á lægsta straum í klukkutíma undir loki.

Kjötið fiskað upp úr sósunni (sem ætti að vera byrjuð að þykkna), og tætt í sundur með tveimur göfflum og bein fjarlægð ef einhver eru. (Ef það gengur illa að tæta er kjötið sett aftur í pottinn og soðið í hálftíma til viðbótar).  Kjötið sett aftur í pottinn og látið malla loklaust þangað til sósan er orðin þykk. Gott að hræra í af og til svo að brenni ekki við. Smakkað til með salti og pipar.

Mér finnst gott að setja saman við smá slettu af Tabasco-sósu (líka seld sem Hot Sauce), og sojasósu eða Worchestershire-sósu, og mala ögn af svörtum pipar yfir í lokin.

Kásunni er síðan skammtað í volg hamborgarabrauð og borin fram.

Það er hægt að bera alls konar meðlæti með þessu eða troða því með í brauðið. Margar hamborgarafyllingar passa mjög vel, t.d. spælt egg, tómatsneiðar og kál. Sumir vilja setja hrásalat (coleslaw) ofan á, en mér finnst hins vegar gott að sykurbrúna lauk* og hafa með.

*Sykurbrúnaður laukur:
Skerið gulan lauk í tvennt og skiptið öðrum helmingnum í tvennt. Sneiðið fjórðungana tvo niður í ca. 1/2 cm þykkar sneiðar og svissið í bræddu smjöri á pönnu þar til laukurinn er mjúkur og aðeins byrjaður að brúnast. Lækkið hitann, bætið við ögn af salti og stráið sykri yfir. Leyfið sykrinum að bráðna og hrærsteikið síðan þar til laukurinn fær á sig gullinbrúnan lit. Skellið heitu ofan á svínakjötsmaukið og berið fram.

Kólumbísk nautakjötskássa/súpa

Þetta er ljúffengur réttur sem ég fann í The Spice Cook Book. Þar sem sú bók er amerísk get ég ekki ábyrgst að þetta sé ekta kólumbísk uppskrift, en rétturinn er góður.

Fyrir 6-8. Rómversku tölurnar í innihaldslistanum vísa til þess hvenær setja á það sem er undir þeim út í súpuna.

Innihald:
I. 
1 kg nautagúllasbitar, ca. 2,5 cm teningar
1 lárviðarlauf
1/2 tsk kúmínfræ (cumin)
6 heil svört piparkorn
1/4 tsk hvítlauksduft
2 tsk salt
1 tsk eplaedik
3 bollar vatn
II.
2 meðalstórar kartöflur
2 meðalstórar gulrætur
4 langar sellerístangir
4 maískólfar, skornir í 5 cm þykkar skífur
1/2 bolli laukur, sneiddur
1/2 bolli ferskir tómatar í bitum
III.
1/2 tsk mulið saffran
1/2 tsk þurrkað oreganó
1/2 bolli ferskar baunir

Aðferð:
I. Fituhreinsið kjötið. Setjið í pott sem tekur a.m.k. 3 lítra, ásamt öllu sem er undir lið I. á listanum. Mallið undir loki í 1 klst. eða þar til kjötið er næstum orðið meyrt.
II. Skrælið kartöflurnar og þvoið gulræturnar og skerið bæði í ca. 1,5 cm breiðar ræmur og setjið í pottinn. Skerið selleríið í ca. 1,5 cm breiða bita og setjið ásamt hinu grænmetinu í pottinn. Sjóðið áfram undir loki í 15 til 20 mínútur eða þar til grænmetið er að verða meyrt.
III. Hrærið saffranið út í 1 tsk af vatni og setjið út í ásamt óreganó og baununum. Hrærið vel saman og gætið þess að skaða ekki grænmetið. Sjóðið í 5 mín undir loki.

Berið fram í súpudiskum með 2-3 skífum af maískólfum sem búið er að reka tannstöngla í (eða maísgaffla).

Unga fólkið og eldhússtörfin: Pottréttur

Þessi pottréttur, sem ætti skilið að heita eitthvað meira en bara „pottréttur“ var vinsæll á heimilinu þegar ég var unglingur.

Matreiðslubók: Unga fólkið og eldhússtörfin
Fyrir 3-4

Efni:
400 g beinlaust nautakjöt eða hvalkjöt (mamma notaði reyndar oftast annað hvort lamba- eða folaldakjöt, sem eru bæði mjög góð í þennan rétt)
1 stór eða 2 litlir laukar
50 g smjör/smjörlíki eða 3 msk matarolía
1 hvítlauksrif
1 paprika, rauð eða græn
3 dl vatn
1/2 dl tómatsósa
1 tsk salt
1 dl sýrður rjómi

Aðferð:
Hreinsið kjötið vel og þerrið. Skerið í munnbita. Flysjið laukinn og fínsaxið ásamt hvítlauknum. Kjarnhreinsið paprikuna og skerið hana í þunnar sneiðar.

Hitið feitina á pönnu og brúnið kjötið og setjið það í pott. Brúnið laukinn og setjið ofan á kjötið og hellið vatninu yfir ásamt tómatsósu, salti, rjóma og paprikusneiðunum. Sjóðið undir loki við lágan hita í 40-50 mínútur.

Tillaga að meðlæti: soðin hrísgrjón, maísbaunir og snittubrauð.

Kókos-kasjú lambakarrí frá Indlandi (Kid Josh)

Matreiðslubók: Charmaine Solomon's Indian Cookbook. (Uppskrift með athugasemdum og ráðleggingum frá mér)

Fyrir: 6


Þessi uppskrift er upprunnin hjá Pörsum í Maharashtra-ríki á Indlandi. Ég gef upp bæði milda og eldsterka útgáfu. Það er reyndar gott að nota heila uppskrift af sósu með helmingi minna af kjöti, því að þetta er ljúffeng sósa og líka af því að í alvöru indversku karríi er kjötið ekki endilega aðalatriðið.

Efni:

Marineringarsósa:
3 tsk. saxaður ferskur engifer
5 tsk. saxaður hvítlaukur (ca. 5 meðalstór rif)
10 græn chili-piparaldin, fræhreinsaðir og stöngulinn fjarlægður, ef óskað er eftir sterku karríi. Þessu má sleppa alveg en ef óskað er eftir mildu chili-bragði er hægt að nota í staðinn chili-duft á hnífsoddi eða bara eitt chili-aldin.
1 tsk. malaður kanill
1/4 tsk. malaður negull
1 1/2 tsk. salt (eða meira, eftir smekk)

Allt hitt:
1 kg lambakjöt, helst af læri, fituhreinsað og skorið í stóra teninga

4 msk. olía til steikingar
Ca. 2 bollar heitt vatn

250 gr. kasjú-hnetukjarnar, fínmalaðir í matvinnsluvél (ef bara finnast saltaðar kasjú-hnetur, örvæntið ekki, notið þær og minnkið bara saltið í uppskriftinni)
1 1/2 bollar kókoshnetumjólk

4 stórar kartöflur, skornar í fjóra báta og steiktar
1 dl ósoðin hrísgjón á mann

Aðferð:
Maukið engiferinn, hvítlaukinn og chili-piparinn í morteli eða matvinnsluvél. Bætið við ögn af vatni til að auðvelda blöndunina. Bætið við hinu kryddinu og saltinu og blandið saman. Skiptið sósunni í tvennt og marinerið kjötið í helmingnum í um 30 mín. Geymið hinn helminginn.

Hitið 2 msk. af olíu á stórri djúpri pönnu eða í víðum potti (þykkbotna, annars er hætt við að brenni við) og brúnið kjötið. Bætið við vatninu og mallið undir loki við lágan hita þar til kjötið er meyrt og eftir er um það bil 1 bolli af soði í pottinum. Gott er að nota kjöt sem hefur fengið að meyrna aðeins í ískápnum í 2-3 daga, en þá ætti þetta að taka um 40 mín. Ef of mikið soð er eftir þegar þessu stigi er náð skal ekki hella soði af kjötinu, heldur er betra að taka lokið af og sjóða áfram þar til það hefur soðið hæfilega niður. Aðskiljið kjöt og soð og leggið til hliðar.

Nú má byrja að sjóða hrísgrjónin og steikja kartöflurnar.

Hitið nú 2 msk. af olíu í stórri djúpri pönnu eða víðum potti og steikið hinn helminginn af kryddmaukinu þar til það skiptir um lit og loðir lítið eitt við pönnuna. Bætið við kókoshnetumjólkinni, soðinu og hnetunum, blandið vel saman og mallið í nokkrar mínútur og hrærið í á meðan. Bætið þvínæst kjötinu saman við og látið malla við lágan hita þar til olían flýtur upp. Það verður að gera þetta við lágan hita því sósan er mjög þykk og getur brunnið við ef hitinn er hærri. Ekki hafa lokið á pottinum á meðan. Smakkið til og saltið ef þarf.

Berið fram heitt með steiktum kartöflum og hrísgrjónum.

Thailenskt massaman-karrí

Þessi réttur er ekki síðri en massaman-karríið sem fæst á thailenskum veitingastöðum í Reykjavík. Ég lærði að elda hann af thailenskum kokki á matreiðslunámskeiði sem ég fór á hjá Asian Market á Suðurlandsbrautinni fyrir nokkrum árum.

Sósan er bragðmikil en ekki sterk. Hún er líka þunn, reyndar svo þunn að ef maður sker kjúklinginn í munnbita (notar þá bringur) væri vel hægt að bera hana fram sem súpu.

Fyrir: 4

Efni:
1. umferð:
500 gr. kjúklingabitar með beini (ca. 1/2 kjúklingur). Einnig má nota skinn- og beinlausa bita, en þá verður sósan ekki eins bragðmikil
1 msk. massaman karrímauk (fæst í Vietnam Market á Suðurlandsbrautinni (við hliðina á Nings))
1 1/2 bolli kókoshnetumjólk


2. umferð:
4 bollar kókoshnetumjólk
1 bolli vatn

3. umferð:
1/2 bolli fisksósa – kokkurinn mælti sérstaklega með Squid-tegundinni
1/2 bolli pálmasykur (fæst í Vietnam Market)
1 1/2 bolli jarðhnetur, heilar og ósaltaðar (má nota möndlur eða kasjú-hnetur í staðinn)
1/2 bolli jarðhnetur, fínsaxaðar eða malaðar (má nota möndlur eða kasjú-hnetur í staðinn)
1/2 bolli tamarind-vatn*
2 bollar saxaður laukur (um 2 meðalstórir laukar)
12 litlar kartöflur, soðnar, kældar og skrældar og skornar í munnbita (það má vel nota þær hráar, en þá er þeim bætt út í lok 1. umferðar þegar búið er að brúna kjúklinginn)
3-4 lárviðarlauf

*Tamarind-vatn: Hellið 1/2 bolla af sjóðandi vatni yfir 25. gr af tamarind-mauki (Tamarind Paste - fæst í Vietnam Market) og látið standa í 5-10 mín. Pikkið þá maukið í sundur með skeið og kreistið safann úr því (ef gert úr mjög þykku mauki). Hendið maukinu og síið vökvann fyrir notkun (ef maukið er tiltölulega þunnt og engin fræ, kekkir eða hýði í því má allt fara með). Thailenski kokkurinn sagði að tamarind-vatn sem fæst tilbúið á flöskum gefi ekki rétt bragð.

Aðferð:
Sjóðið 1 1/2 bolla af kókoshnetumjólk við meðalhita á djúpri pönnu eða í víðum potti þar til hún skilur sig og olían flýtur upp. Setjið þá karrímaukið saman við, hrærið vel saman og eldið í 3-4 mín.

Hækkið hitann, setjið kjúklinginn út í og hræristeikið í 2-3 mín. til að brúna kjúklinginn. (Nú eru kartöflurnar settar saman við ef þær eru hráar).

Setjið 2 bolla af kókoshnetumjólk saman við ásamt vatninu og hrærið vel saman.

Látið sjóða, lækkið hitann og setjið því næst út í jarðhneturnar, pálmasykurinn, fisksósuna, tamarind-vatnið og lárviðarlaufin og látið malla í 10-15 mín.

Setjið þá kartöflurnar saman við (ef notaðar eru soðnar kartöflur) ásamt lauknum og sjóðið við lágan hita í 5-10 mín. Gætið þess að laukurinn á að vera örlítið brakandi undir tönn þegar karríið er borið fram.

Smakkið til undir lokin með pálmasykri ef karríið er ekki nógu sætt.

Berið fram með jasmínuhrísgrjónum og fersku salati.

Massaman er stundum stafsett matsaman. Orðið mun þýða múslími á thailensku.

Spænskur hrísgrjónaréttur

Þetta er bragðmikill en ekki sterkur réttur með ríkjandi bragði af paprikudufti og tómötum og keim af hvítlauk, lauk, ferskri papriku og kjöti.

Ég ákvað að birta ekki mynd af honum því hann er frekar ljótur á mynd þó bragðgóður sé.

Matreiðslubók: Sælkerasafnið: Ódýrt og gott
Fyrir 4.

Efni:
400 gr. kjöt (lamba- eða nautakjöt)
1 1/2 tsk. smjör
2 laukar, saxaðir
2 hvítlauksrif, marin (eða meira, eftir smekk)
1 græn paprika, sneidd
1/2 tsk. paprikuduft
2 tsk. salt
saffran eða kúrkúma á hnífsoddi
1 dós (400 gr.) tómatar
2,5 dl vatn
1/2 til 1 teningur af kjötkrafti
2 dl hrísgrjón

Aðferð:
Bræðið smjörið í potti/djúpri pönnu. Skerið kjötið í gúllasbita og brúnið í smjörinu. Bætið við lauk, hvítlauk og papriku og mallið í smá stund. Bætið við paprikudufti, saffrani/kúrkúma, salti, tómötum, vatni, soðteningi og hrísgrjónum. Sjóðið undir loki í þann tíma sem er gefinn upp fyrir hrísgrjónin (oftast 15-25 mín.). Hafið auga með pottinum og bærið við vatni ef það virðist vera að sjóða upp.

Berið fram með salatblöðum.

Ég mæli þar að auki með að mylja smá svartan pipar út í réttinn rétt áður en hann er borinn fram.

Í sumar útgáfur af þessum rétti eru notaðar baunir, sem er mjög gott.

Hakk og kartöflur í karríi (Keema Alu Kari)

Þetta er milt karrí, en auðvitað má gera það sterkara með því að auka chili-skammtinn. Nota má hvort sem er nautahakk eða kinda-/lambahakk.

Keema er Hindi/Urdu yfir hakkað kjöt, og alu (oftast nær skrifað aloo) eru kartöflur. Kari er karrí.

Matreiðslubók: Charmaine Solomon‘s Indian Cookbook

Fyrir: 4-6.

Efni:
3 msk. matarolía eða ghee (skírt smjör)
2 meðalstórir laukar, fínsaxaðir
1 tsk. fínsaxaður hvítlaukur
1 tsk. fínt rifinn ferskur engifer
1/2 tsk. kúrkúma-duft (túrmerik)
2 tsk. kóríander, malaður
1 tsk. cummin, malað
1/2 tsk. chilli-duft (má sleppa)
2 tsk. salt
2 msk. sítrónusafi eða edik
500 gr. lamba- eða nautahakk
500 gr. kartöflur, skrældar og skornar í fernt
1 bolli heitt vatn
1 tsk. garam masala kryddblanda

Til skrauts:
2 msk. söxuð fersk mynta eða kóríanderlauf (chilantro)

Aðferð:
Hitið olíu eða ghee á djúpri þykkbotna pönnu og steikið laukinn, hvítlaukinn og engiferinn þar til mjúkt og ljósgullið á lit.

Bætið við kúrkúmu, kóríander, cummin, chilli-dufti (ef notað) og steikið í 1 mín. og hrærið stöðugt í á meðan.

Bætið við saltinu og sítrónusafanum/edikinu og þegar blandað byrjar að snarka á pönnunni er kjötinu bætt við og það steikt og hrært stöðugt í á meðan, þar til allt hakkið er brúnað og það er kekkjalaust.

Bætið þá við kartöflunum og heita vatninu, látið suðuna koma upp, lækkið hitann og setjið lokið á pönnuna og látið malla í um 30 mín. eða þar til kartöflurnar eru gegnsoðnar og kjötið meyrt.

Hrærið í af og til undir lokin á eldunartímanum til að tryggja að karríið brenni ekki við.

Stráið garam masala yfir, hrærið létt saman við og berið fram skreytt með myntu eða kóríanderlaufum.

Vindaloo-kjúklingakarrí frá Goa (Murg Vindaloo)

Matur frá Goa á Indlandi þykir mjög gómsætur og sérstakur. Í 450 ár blandaðist saman matargerð innfæddra við portúgalska matarhefð á þeim tíma sem Goa var portúgölsk nýlenda, og útkoman var nokkuð  alveg sérstakt.

Vindaloo er karrí sem er lagað með ediki og getur innihaldið kjúkling, lambakjöt eða svínakjöt. Það er oftast sterkkryddað og með miklum chili-pipar, en þessi útgáfa er mildari og hentar ágætlega þeim sem vilja karríið sterkt en ekki þannig að logarnir standi út um eyrun á þeim.

Kjúklingurinn verður meyr og vel kryddaður en ekki eldsterkur. Það er snarpt eftirbragð af sósunni, sennilega út af edikinu.

Matreiðslubók: Charmaine Solomon's Indian Cookbook

Fyrir: 4-6
Eldunartími: um 50 mínútur, plús 60 mínútur til að marinera.

Efni:
1,5 kg. af blönduðum kjúklingabitum, svo samsvarar einum kjúklingi: leggir, læri og bringa í fjórum bitum (ég notaði vængi þegar ég prófaði uppskriftina og stytti eldunartímann svolítið og það kom vel út)
4 msk. djúpsteikingarolía
2 tsk. salt
1/2 tsk. malaður svartur pipar

Karrímauk:
2 msk. cummin-fræ
1 msk. svört sinnepsfræ (má nota brún)
2 tsk. chili-duft eða eftir smekk
1 msk. saxaður ferskur engifer
1 msk. saxaðar ferskur hvítlaukur
1/2 bolli edik (bara venjulegt, ekki bragðbætt)
1 tsk. kanill
1/4 tsk. negull
1/4 tsk. kardimommur

Aðferð:

Setjið cummin-fræin og sinnepsfræin í blandara með chili, engifernum, hvítlauknum og edikinu. Saxið vel saman og hrærið kanil, negul og kardimommum saman við. Maukið verður mjög þykkt.

Hitið olíuna í þykkbotna potti. Ekki nota járnpott því að það geta orðið efnahvörf í honum vegna ediksins. Þegar olían er orðin steikingarheit, takið hana þá af hellunni og setjið karrímaukið á hana. Hrærið í nokkrar sekúndur til að hita maukið (ekki reyna að blanda saman við olíuna). Setjið því næst kjúklinginn á pönnuna og hrærið vel til að húða kjúklinginn með maukinu. Takið kjúklinginn af pönnunni og setjið í skál og látið standa í um klukkustund í kæli til að maukið nái að síga inn í kjúklinginn.


Eftir klukkustund skal taka kjúklinginn og setja aftur á kalda pönnuna og láta hann hitna á pönnunni við lágan hita þangað til að kraumar í sósunni. Bætið við salti og pipar og mallið áfram þar til kjúklingurinn er gegnsteiktur. Hræri í af og til svo að kryddið brenni ekki við pönnuna.

Berið fram með soðnum hrísgrjónum.

Líka góður kaldur.

Ungverskt gúllas

Gúllas er oft kennt við Ungverjaland, en reyndar eru kássur eða þykkar súpur með þessu nafni þekktar í nágrannalöndunum og fleiri Evrópulöndum, svo sem Tékklandi, Slóvakíu, Austurríki, Þýskalandi, Slóveníu, Króatíu, Póllandi og Ítalíu. Uppskriftirnar eru fjölbreyttar, en flestar eiga sameiginlegt að innihalda að minnsta kosti papriku og kjöt.

Þetta er þykk og bragðmikil kássa, frábær til að fá í sig yl eftir að hafa verið úti í köldu veðri.Það tekur talsverðan tíma að elda hana, en hún er vel þess virði.

Matreiðslubók: The Spice Cookbook eftir Lillie Stuckey and Avanelle Day. Útg. 1964.
Fyrir: 5-6 manns.
Tími: 100-130 mínútur.

EFNI:

1. Umferð:
1 kg. nautakjöt (gúllasbitar)
2 msk. shortening-feiti (í staðinn má nota svínafeiti (lard) eða Palmín/kókosfeiti í sama magni, eða 2 msk. plús 1. tsk. af smjöri eða smjörlíki)
2 meðalstórir laukar, þunnt sneiddir

2. Umferð:
1 tsk. salt
1/2 tsk. nýmalaður svartur pipar
2 tsk. ungverskt paprikuduft
1/8 tsk. Cayenne-pipar (sleppið til að fá mildari kássu, aukið til að búa til sterka kássu eða chilli)
1 bolli vatn

3. Umferð:
3 meðalstórar kartöflur, skornar í 8 ca. jafnstóra parta (skorin í helming, aftur í helming, og hver biti í helming)
1/3 bolli græn paprika, söxuð í ca 1 cm bita

4. Umferð:
1 tsk. Ungverskt paprikuduft

AÐFERÐ:

1. Umferð:
Fituhreinsið kjötið, og ef þarf takið stærri bitana og skerið í teninga, ca. 2,5 cm á kant. Bræðið helminginn af feitinni á djúpri pönnu eða í potti og brúnið kjötið á allar hliðar. Takið af pönnunni, setjið restina af feitinni á pönnuna og steikið laukinn við lágan hita þar til hann tekur á sig ljósbrúnan lit. Setjið kjötið aftur á pönnuna.

2. Umferð:
Bætið öllum innihaldsefnum 2. umferðar á pönnuna og mallið undir loki þar til kjötið er meyrt. Ef gúllasbitarnir eru af meyrari parti skepnunnar þarf þetta ekki að taka lengur en klukkustund, en getur tekið upp undir 90 mínútur ef kjötið er seigt.

3. Umferð:
Setjið innihaldsefni merkt 3. Umferð út í kássuna og mallið í 30 mín. í viðbót, eða þar til kartöflurnar eru gegnsoðnar.

4. Umferð:
Bætið paprikuduftinu út í og blandið vel. Smakkið til með salti og pipar ef þarf.

Berið fram heitt með salati og hrísgrjónum eða ungverskum soðkökum (dumplings).

Athugasemdir:

Það er líka hægt að gera þessa kássu með lamba- eða kindaskönkum, en hún verður ekki eins bragðmikil.

Ódýr og fljótlegur baunaréttur

Þá er loksins komið að uppskriftunum. Þennan rétt fann ég upp þegar ég var nýútskrifuð úr Ferðamálaskólanum og var að leita mér að vinnu sem hæfði menntun minni. Á meðan vann ég í heimilishjálp hjá Reykjavíkurborg og þurfti að lifa á þeim svívirðilegu lágmarkslaunum sem þar voru greidd. Þá fann ég upp þennan rétt, sem er ódýr og seðjandi og dugði mér í tvær máltíðir. Ég borðaði yfirleitt annan skammtinn með brauði og hinn sem fyllingu í tortillur eða taco-skeljar.

Fyrir 2.

Efni:
1 dós af nýrnabaunum eða nýrnabaunum með chili, með vökvanum
1 meðalstór laukur, þunnt sneiddur
2 eða fleiri hvítlauksrif, söxuð eða kramin
1 lítil rauð eða græn paprika, skorin í litla bita
100 gr. beikonhakk eða beikonsneiðar, skornar í litla bita
Tómatsósa eða tómatmauk eftir smekk
Pipar og salt
saxaður rauður chilipipar eftir smekk (má sleppa, þarf minna ef chilibaunir eru notaðar)

Til viðbótar ef fjárhagurinn leyfir:
Pylsur, skornar í bita, eða
Nautahakk sem búið er að brúna á pönnu

Aðferð:
Setjið allt nema saltið, piparinn og chilipiparinn (og pylsurnar, ef þær eru til staðar) í pott og hitið upp að suðu. Lækkið hitann þegar suðan kemur upp og bætið kryddinu og saltinu saman við. Mallið við lágan hita þar til sósan þykknar. Ef pylsur eru notaðar eru þær settar saman við ca. 5 mín. áður en rétturinn er borinn fram.

Ef nota á sem fyllingu í tortillur er rifnum osti stráð yfir heita fyllinguna þegar rétturinn er borinn fram.
Til að gera fyllingu fyrir taco-skeljar er bætt við sýrðum rjóma, rifnu kínakáli, söxuðum tómötum og rifnum osti.