Appelsínukjúklingur með austrænum keim, fyrir einn

Mig langaði í appelsínukjúkling í hádeginu og af því að ég átti kjúklingabringu, appelsínumarmelaði og appelsínusafa ákvað ég að slá til og elda réttinn.


Ég tel mig vera nokkuð glúrna í að minnka uppskriftir, en í gær nennti ég því ekki og ákvað að gera frá grunni mína eigin uppskrift sem hentar fyrir einn. Hún heppnaðist það vel að ég ákvað að birta hana hérna.



Uppskriftin:

• 1 beinlaus kjúklingabringa, þerruð og skorin í tvennt langsum, og síðan í ca. 1,5 cm þykka strimla
• Blanda af 2 msk hveiti með salti og nýmöluðum svörtum pipar eftir smekk (ca. 1/2 tsk salt og 1/8 tsk pipar hentar vel)
• 1 msk steikingarolía eða -feiti (ég notaði ósaltað smjör)
• 1 skallottlaukur*, skorinn í tvennt langsum og síðan í mjóar ræmur þversum
• 1/4 rauð paprika, söxuð í ca. 0,5 cm bita (má nota meira eða minna eftir smekk eða sleppa alveg)
• Sósa: 1/4 bolli appelsínumarmelaði, 2 msk appelsínusafi**, 2 msk sojasósa og 1 msk hunang***, hrært vel saman

Olían/feitin hituð á pönnu. Á meðan er kjúklingabitunum velt upp úr hveitiblöndunni.

Laukurinn og paprikan sett á pönnuna og svissað þar til laukurinn er mjúkur (1-2 mínútur). Tekið af pönnunni. Hitinn lækkaður, kjúklingurinn settur á pönnuna og brúnaður við meðalhita.

Hitinn lækkaður og laukurinn og paprikan sett á pönnuna ásamt sósunni. Hrært vel saman. Mallað undir loki við lágan hita í 10 mínútur og 5 mínútur til viðbótar með lokið af til að þykkja sósuna. Ef bringan er mjög stór og þykk gæti þurft 5 mín suðu til viðbótar.

Sósan á ekki að vera mjög þykk. Gætið þess að hún getur brunnið auðveldlega út af hunanginu og sykrinum í marmelaðinu. Ef hún þykknar mikið áður en kjúklingurinn er gegnsoðinn má þynna hana með appelsínusafa. Ef hún aftur á móti er lapþunn þegar kjúklingurinn er gegnsoðinn má veiða kjúklingabitana upp úr henni og þykkja hana síðan með smá Maizena-mjöli eða ögn af kartöflumjöli sem er hrært út í vatni og síðan saman við sósuna og látið sjóða í ca. 1 mínútu. Smakkið til með salti og pipar ef þarf.

Borið fram með soðnum hrísgrjónum og salati.

Lærdómur og athugasemdir:
*Prófa blaðlauk eða vorlauk í staðinn fyrir skallottlauk.
**Appelsínubragðið er milt og gott, en til að fá meira kikk í sósuna mætti prófa að setja svolítið af rifnum appelsínuberki í hana til að fá meira appelsínubragð. Passa sig samt, því hún gæti orðið römm ef maður notar of mikið.
***Hunangið má ekki vera beiskt, því beiskjubragðið magnast við suðu og getur skilið eftir sig leiðinlegt eftirbragð, eins og ég lærði af biturri reynslu þegar ég var að prófa aðra uppskrift. Það var vottur af beyskju af sósunni, þannig að næst ætla ég að prófa pálmasykur eða púðursykur í staðinn fyrir hunang.

Svínakjöt í rjómasósu

Þetta er eðal-spariréttur réttur sem ég elda af og til. Hann má líka gera með kjúklingi, t.d. lundum eða bringum.

Fyrir 2.

Efni:

• smjör
• 1/2 laukur, skorinn í ca 1/2 cm þykkar sneiðar
• 1 bakki sveppir, skornir í tvennt og sneiddir í ca. 1/2 cm sneiðar
• 2-300 g svínakjöt í bitum, ca. 2 cm þykkum (ég notaði svínalund, skorna í medallíur þegar ég tók myndirnar)
• hveiti
• salt og pipar
• Aromat (má sleppa)
• Töfrakrydd frá Kryddgöldrum
• 1 dl vatn
• 1 dl rjómi

Aðferð:
Blandið salti og kryddi eftir smekk saman við hveiti og veltið kjötinu upp úr því.

Bræðið klípu af smjöri á meðalheitri pönnu og steikið laukinn þar til hann er hálfglær og mjúkur. Takið af pönnunni og geymið. Bræðið væna klípu af smjöri á pönnunni og brúnið sveppina. Takið af pönnunni og geymið (má fara saman við laukinn).

Setjið hveitihjúpað kjötið á pönnuna og brúnið. Bætið við lauk, sveppum og vatni. Látið sjóða í 10-15 mín. eða þar til kjötið er meyrt en ekki orðið þurrt. Bætið við vatni eins og þarf en leyfið vökvanum að sjóða niður og þykkna undir það síðasta (ca. 5 mín.). Bætið við rjómanum og sjóðið í 2-3 mín. til að þykkna aðeins.

Berið fram með soðnum hrísgrjónum eða pasta og fersku salati.

Epla- og peru- Bettý

Matreiðslubók: The Spice Cookbook

Brúna Bettý (Brown Betty) er nafn á amerískum eftirrétti sem samanstendur af krydduðum ávöxtum og sætri mylnsnu og er borinn fram með þeyttum rjóma eða sætri sósu. Vinsælasta útgáfan er með eplum en hér eru notuð bæði epli og perur.

Síðan ég fór að gera þennan eftirrétt er ég hætt að nota uppskrift, en hér er hún eins og hún kemur fyrir í bókinni. Hún ætti hiklaust að duga í eftirétt fyrir 8 manns.

Ef perurnar eru bragðlitlar eða mjög sætar er best að nota græn (súr) epli með þeim, en annars eru sæt-súr gul epli góð í þessa uppskrift.

Efni:
3 ferskar perur, þroskaðar en þéttar (mikilvægt svo að þær verði ekki orðnar að mauki áður en eplin eru gegnsoðin)
3 súr fersk epli

1 bolli létt muldar kornflögur
1/2 bolli sykur
1/2 tsk. múskat (duft)
1/2 tsk. rifinn sítrónubörkur (bara þetta gula)
1/2 tsk. salt
2 msk. smjör

Aðferð:
Þvoið ávextina, skrælið og skerið í frekar þunnar sneiðar. Smyrjið stórt, djúpt ofnfast mót og raðið 1/4 af sneiðunum í botninn (í upphaflegu uppskriftinni er talað um 1 1ítra mót, sem er annað hvort bjartsýni eða þá að epli og perur vou almennt talsvert minni á sjöunda áratugnum en þau eru nú). Blandið saman sykri, múskati og sítrónuberki og stráið 1/4 af því og 1/4 af kornflögunum yfir ávaxtasneiðarnar. Setjið smá smjörklessur úr 1/2 msk af smjöri hér og þar ofan á.
Endurtakið þar til lögin eru orðin fjögur.

Bakið við 175°C í 60 til 90 mín. eða þar til ávextirnir eru gegnsoðnir.

Berið fram með þeyttum rjóma, sýrðum rjóma eða harðri sósu (sjá uppskrift fyrir neðan).

Athugasemdir:

• Það má vel tvöfalda múskatið því það rétt örlar fyrir bragðinu af því.
• Gott er að nota demerara-sykur í staðinn fyrir hvítan, en milt bragðið af perunum finnst ekki ef notaður er púðursykur. Prófið því að nota bara græn epli ef óskað er eftir púðursykri.

Ég nota nú bara oftast ís eða rjóma, en þessi sósa ku vera mjög góð með Bettý:

Hörð sósa með koníaki eða brandíi:

Hún er sennilega kölluð „hörð“ sósa af því að það er áfengi í henni, en annars er hún líka mjög þykk.

2/3 bolli smjör
1/4 tsk. múskat (duft)
2 bollar sigtaður flórsykur (sigtaður og síðan mældur)
2 msk. brandí eða koníak
Malað múskað

Hrærið smjörinu og múskatinu vel saman og blandið til skiptis saman við það koníaki og sykri í smáskömmtum og hrærið vel saman á milli, þar til allt koníakið og sykurinn eru gengin upp í smjörið. Þeytið þar til létt og loftkennt og berið fram með plómubúðingi eða heitum ávaxtaeftirréttum. Stráið ögn af múskati yfir til skrauts.