Pylsu- og beikonvefja

Mig langaði að breyta til um daginn og henti saman nokkrum afgöngum úr frystinum hjá mér. Útkoman varð þessi:

Uppskrift fyrir einn:
1 hveititortilla
1 vínarpylsa
nægjanlegt beikon til að vefja tvö lög af því utan um pylsuna
ostur, rifinn og sneiddur (gott að blanda saman t.d. gouda og parmesan)
pipar


Beikoninu vafið utan um pylsuna:

Ræmu af rifnum osti stráð eftir miðri tortillunni:

Beikonvafða pylsuan lögð ofan á, rifnum osti stráð yfir og svartur pipar mulinn yfir eftir smekk:

Tortillunni lokað utan um pylsuna og fest með því að negla tvo tannstöngla í gegn. Ostsneiðar lagðar ofan á.

Gott er að bleyta brúnirnar á tortillunni (þeim sem ekki hverfa undir ostinn) með vatni til að þær verði ekki gegnþurrar.

Hitað í 15 mín í 180 °C ofni (blástursofn, ca. 190 °c í venjulegum ofni). Voilá!:

Ég er handviss um að þetta verður að hreinasta veislurétti ef maður notar smjördeig í staðinn fyrir tortillur (þá má líka sleppa sneidda ostinum til að fá fallegri vefju). Þá mundi maður kalla þetta "Innbakaðar vínarpylsur með beikoni".

Hvítbauna- og kartöflusúpa

Þessi súpa verður gullin á litinn en getur líka orðið grænleit eða jafnvel appelsínugul, allt eftir því hvaða blanda af grænmeti er notuð. Þetta er mín eigin uppskrift og ætti að duga tveimur í máltíð (með brauði) eða í forrétt fyrir 3-4. Þetta er svokölluð eldhúsvasks- eða ískápsuppskrift, því maður notar í hana það grænmeti sem maður á til.

Ég átti reyndar ekkert grænmeti þegar ég mallaði henni saman fyrst (uppgefin uppskrift) og mér þykir hún alltaf best þannig, en það er líka gott að bæta 1-2 söxuðum gulrótum við uppskriftina, sneiddum púrrulauk, sellerístöng í sneiðum, hnúðkáli í bitum og jafnvel saxaðri papriku. Bragðið breytist auðvitað svolítið eftir því hvaða  grænmeti er notað.

En sem sagt, hvítbaunasúpa a la moi, grunnuppskrift:


1 bréf beikon, hver sneið skorin í 5-6 bita, eða bréf af beikonkurli og 3-4 sneiðar af beikoni til skrauts, skornar eins og getur að framan
--
1/2 laukur, skorinn í tvennt og sneiddur þunnt
3-4 meðalstórar kartöflur, skrældar og skornar í 8 bita hver

 --
1 dós smjörbaunir eða hvítbaunir (cannelini), soðinu hellt frá og baunirnar skolaðar úr köldu vatni
1 lítri vatn
grænmetiskraftur eftir smekk
Aromat (ef vill, eykur fyllingu í bragðinu)
salt og pipar

Súpupottur hitaður og beikonið steikt í honum því þar til það er að verða gegnsteikt en ekki hart og fitan er farin að renna. Ef notað er kurl og sneiðar eru sneiðarnar teknar úr pottinum og lagðar til hliðar (það er ágætt að steikja þær heilar og klippa svo niður í pottinn þegar þar að kemur). Ef eftir er meiri fita en ca. 2 msk er umframfitunni hellt frá. Ef hún er minni er bætt við smá klípu af smjöri.

Laukurinn svissaður í fitunni þar til hann er glær og aðeins byrjaður að brúnast. Kartöflunum bætt út í og steiktar þar til þær byrja að brúnast á brúnunum. Vatnið sett út í ásamt baunum og grænmetiskrafti (gott að miða magnið á honum við 1/2 lítra af vatni miðað við leiðbeiningar á umbúðunum og bæta frekar meiru við undir lokin, því grænmetiskraftur er misjafnlega sterkur (og saltur)). Suðan látin koma upp og látið malla í 20 mínútur undir loki.

Að 20 mín liðnum er tekin ausa og veidd upp af botninum ausufylli af beikoni, kartöflum og baunum og tekið til hliðar. Þvínæst er afgangurinn af súpunni maukaður. Best er að nota töfrasprota og gera það beint í pottinum, en líka má hella henni í matvinnsluvél. Síðan er súpan sem tekin var til hliðar sett saman við aftur ásamt beikoninu sem var tekið til hliðar í upphafi. (Það má auðvitað mauka súpuna alla, en mér finnst hún a.m.k. meira spennandi og fallegri svona). Látið malla í 15 mínútur til viðbótar með lokið af.

Smakkað til með salti, pipar og Aromati. Flott að skreyta með einhverju grænu áður en er borið fram, t.d. graslauk eða steinselju, eða þá með fínt saxaðri rauðri eða grænni papriku. Gott með grófu brauði.

Kúbönsk svartbaunasúpa

Þetta er ljúffeng og nærandi baunasúpa sem er góð til að ylja sér á í vetrarkuldanum. Hún á ættir að rekja til Kúbu.

Athugið að hún er þannig gerð að hún er best þegar allt er komið saman, þ.e. súpan og ofanálætið.

Fyrir 8 eða fleiri

Í súpuna:
500 g þurrkaðar svartar baunir
-
1 meðalstór laukur, fínsaxaður
1 græn paprika, fínsöxuð
3 hvítlauksrif, maukuð
1 reyktur svínaskanki (hefur fengist í Bónus); líka má nota skinkubein, t.d. innan úr hamborgarahrygg**
1/2 bolli ólífuolía
Salt og nýmalaður svartur pipar
-
1/3 bolli edik eða eplaedik

Ofan á:
Sýrður rjómi
Saxaður hrár laukur
Söxuð rauð paprika

Takið baunirnar ca. hálfum sólarhring áður en byrja á að sjóða súpuna og fjarlægið stöngulbrot, steina og baunir sem eru brotnar eða skrælnaðar. Setjið í stóran pott (2 lítra eða stærri) með loki og hellið nægu köldu vatni yfir þær til að fljóti yfir ca. 2-3 cm. Látið liggja í bleyti í ca. hálfan sólarhring, t.d. yfir nótt.

Þegar baunirnar hafa legið í bleyti nógu lengi er vatninu hellt af þeim og sett hreint vatn í pottinn þannig að fljóti yfir baunirnar ca. 2-3 cm. Hrærið saman við saxaða lauknum, paprikunni og hvítlauknum, hrærið ólífuolíunni saman við og setjið svínaskankann út í. Bætið við ca. 2 tsk af salti og slatta af pipar.

Látið suðuna koma upp við háan hita. Fleytið froðunni ofan af og lækkið hitan á minnsta hita sem þarf til að halda súpunni mallandi. Látið malla í 4 til 5 klukkutíma, þar til baunirnar eru mjög mjúkar og súpan er rjómakennd og hefur þykknað. Athugið eftir um 2 klst. Ef hún er orðin mjög þykk eða kássukennd skal bætt við bolla af vatni. Endanleg þykkt á að vera þannig að hún húðar bakið á skeið og áferðin á að vera flauelsmjúk og þykk.

(Baunirnar verða mjúkar á fyrstu tveimur tímunum. Restin af tímanum er til að hluti af baununum nái að brotna niður og þykkja súpuna. Ef þetta hefur ekki gerst eftir 5 tíma suðu, þá mæli ég með að fara með töfrasprota eða kartöflustappara í pottinn og mauka hluta af baununum, hræra upp í henni og láta malla í ca. hálftíma til viðbótar. Áferðin verður svipuð, en þó geta verið stöku flögur af baunahúð fljótandi í súpunni.)
Hrærið edikinu saman við undir lokin og látið malla í 15 mín. til viðbótar með pottinn opinn.
Ausið í skálar og stráið söxuðum hráum lauk og rauðri papriku yfir og setjið slettur af sýrðum rjóma ofan á.

-Hellið yfir soðin hrísgrjón til að gera súpuna matarmeiri og berið fram steikta mjölbanana** (plantain) sem meðlæti.
-Þessi uppskrift gerir mikið af súpu, en hún geymist vel í frysti.

*Kjötið er bara notað til að fá kraft í súpuna og er ekki borið fram með eða í henni og því má vel nota bein. Ef hins vegar er notað kjöt, þá er það, eftir svona langa suðu, hins vegar gómsætt og svo mjúkt að það er nánast orðið að kæfu. Ég nota það sem álegg á brauð.

**Steiktir mjölbananar (Plátanos Maduros)

• 1 vel þroskaður mjölbanani með svart hýði
• Repju- eða maísolía
• Ef vill: ferskt súraldin

 Hellið olíu á pönnu þannig að hún verði rétt rúmlega 0,5 cm á dýpt.
Skrælið bananann og skáskerið í sneiðar, rúmlega 1 cm þykkar.
Setjið á pönnuna þegar vatnsdropi sem er látinn falla í olíuna sýður strax upp og steikið þar til sneiðarnar eru gullinbrúnar og snúið þá við.
Takið af pönnunni þegar báðar hliðar eru gullinbrúnar og brúnirnar eru karamellulitar og látið olíuna renna af þeim á pappírsþurrkum. Þerrið burt umframolíu.
Berið fram heitt.
Ef vill má kreista yfir ögn af súraldinsafa.

Bananar í romm-karamellusósu

Þessi uppskrift er byggð á uppskrift að frægum eftirrétti, Bananas Foster.

Ég neyddist til að einfalda hana af því að ég átti ekki bananalíkjör og tímdi ekki að kaupa hann bara fyrir eina uppskrift. Ég gleymdi hreinlega líka að það er kanill í upprunalegu uppskriftinni, en ætla að prófa að hafa hann með næst.

Þetta dugir í matarmikinn eftirrétt fyrir 2.

2 msk smjör
1/4 bolli dökkt romm
1/3 bolli púðursykur, þjappaður
2 bananar
vanillurjómaís

Takið ísinn úr frystinum til að láta hann mýkjast, ca. 10 mínútum áður en bera á réttinn fram. Hann á að vera aðeins byrjaður að mýkjast en ekki að renna út. Eins og sjá má á myndinni urðu smá tafir hjá mér og ísinn var orðinn helst til mjúkur þegar myndatakan hófst, og ekki batnaði það þegar heit sósan kom út á.

Setjið smjörið, rommið og púðursykurinn saman á pönnu (það má nota pott ef ekki á að flambera) og látið suðuna koma upp við lágan hita. Hrærið vel saman þegar smjörið er bráðið og látið malla þar til sósan hefur er vel runnin saman og hefur þykknað aðeins (5-7 mínútur).

Flysjið bananana og skerið í helminga, fyrst þversum og síðan eftir endilöngu. Setjið í karamellusósuna og látið hitna í ca. 2 mínútur. Bananarnir eiga alls ekki að soðna, heldur eiga þeir bara að hitna í gegn.

Nú má kveikja í réttinum (flambera hann). Það er alls ekki nauðsynlegt, en virkar mjög flott á gesti. Gætið þess bara að kveikja ekki í húsinu, því logarnir geta orðið meiri en maður býst við. Setjið ísinn í skálarnar áður en flamberingin fer fram.

Til að flambera: Berið eld að sósunni og látið loga í smástund. Það ætti að slokkna í henni af sjálfu sér en hafið lokið tilbúið til að skella því yfir pönnuna ef eitthvað skyldi fara úrskeiðis. Ef ekki vill kvikna í sósunni má hella 1 msk. af rommi ofan á hana og láta rommið hitna í ca. 2 mínútur áður en kveikt er í.

Skafið ísinn í skálar, leggið fjögur bananastykki ofan á ísinn í hvorri skál og skiptið sósunni jafnt á milli skálanna. Berið fram strax.

Athugasemdir:

• Þetta er bragðmikill og frekar sætur eftirréttur. 
• Af því að það varð afgangur af sósunni prófaði ég hana út á niðursoðnar apríkósur sem ég átti afgang af inni í ísskáp og sósan fór mjög vel með svolítið súru, skörpu bragðinu af apríkósunum. 
• Ég ímynda mér líka að þetta væri gott með Jonagold eplum, kirsuberjum eða bláberjum.
• Svo er sósan líka góð ein og sér út á ís, sérstaklega ef maður hefur fyrir því að láta hana þykkna aðeins meira þannig að úr verður síróp, en gætið þess samt að brenna hana ekki. 

Appelsínukjúklingur með austrænum keim, fyrir einn

Mig langaði í appelsínukjúkling í hádeginu og af því að ég átti kjúklingabringu, appelsínumarmelaði og appelsínusafa ákvað ég að slá til og elda réttinn.


Ég tel mig vera nokkuð glúrna í að minnka uppskriftir, en í gær nennti ég því ekki og ákvað að gera frá grunni mína eigin uppskrift sem hentar fyrir einn. Hún heppnaðist það vel að ég ákvað að birta hana hérna.



Uppskriftin:

• 1 beinlaus kjúklingabringa, þerruð og skorin í tvennt langsum, og síðan í ca. 1,5 cm þykka strimla
• Blanda af 2 msk hveiti með salti og nýmöluðum svörtum pipar eftir smekk (ca. 1/2 tsk salt og 1/8 tsk pipar hentar vel)
• 1 msk steikingarolía eða -feiti (ég notaði ósaltað smjör)
• 1 skallottlaukur*, skorinn í tvennt langsum og síðan í mjóar ræmur þversum
• 1/4 rauð paprika, söxuð í ca. 0,5 cm bita (má nota meira eða minna eftir smekk eða sleppa alveg)
• Sósa: 1/4 bolli appelsínumarmelaði, 2 msk appelsínusafi**, 2 msk sojasósa og 1 msk hunang***, hrært vel saman

Olían/feitin hituð á pönnu. Á meðan er kjúklingabitunum velt upp úr hveitiblöndunni.

Laukurinn og paprikan sett á pönnuna og svissað þar til laukurinn er mjúkur (1-2 mínútur). Tekið af pönnunni. Hitinn lækkaður, kjúklingurinn settur á pönnuna og brúnaður við meðalhita.

Hitinn lækkaður og laukurinn og paprikan sett á pönnuna ásamt sósunni. Hrært vel saman. Mallað undir loki við lágan hita í 10 mínútur og 5 mínútur til viðbótar með lokið af til að þykkja sósuna. Ef bringan er mjög stór og þykk gæti þurft 5 mín suðu til viðbótar.

Sósan á ekki að vera mjög þykk. Gætið þess að hún getur brunnið auðveldlega út af hunanginu og sykrinum í marmelaðinu. Ef hún þykknar mikið áður en kjúklingurinn er gegnsoðinn má þynna hana með appelsínusafa. Ef hún aftur á móti er lapþunn þegar kjúklingurinn er gegnsoðinn má veiða kjúklingabitana upp úr henni og þykkja hana síðan með smá Maizena-mjöli eða ögn af kartöflumjöli sem er hrært út í vatni og síðan saman við sósuna og látið sjóða í ca. 1 mínútu. Smakkið til með salti og pipar ef þarf.

Borið fram með soðnum hrísgrjónum og salati.

Lærdómur og athugasemdir:
*Prófa blaðlauk eða vorlauk í staðinn fyrir skallottlauk.
**Appelsínubragðið er milt og gott, en til að fá meira kikk í sósuna mætti prófa að setja svolítið af rifnum appelsínuberki í hana til að fá meira appelsínubragð. Passa sig samt, því hún gæti orðið römm ef maður notar of mikið.
***Hunangið má ekki vera beiskt, því beiskjubragðið magnast við suðu og getur skilið eftir sig leiðinlegt eftirbragð, eins og ég lærði af biturri reynslu þegar ég var að prófa aðra uppskrift. Það var vottur af beyskju af sósunni, þannig að næst ætla ég að prófa pálmasykur eða púðursykur í staðinn fyrir hunang.

Heitir og sætir beikonvafðir kjúklingabitar

Smellið á myndina til að stækka hana

Ég smakkaði eitthvað svipað og þennan rétt í samkvæmi fyrir nokkru síðan en gleymdi að biðja um uppskrift. Það reyndist aftur á móti ekki erfitt að finna út úr uppskriftinni. Það eina sem ég breytti var að ég nota langtum minni chili-pipar en var í réttinum eins og ég smakkaði hann fyrst. (Ekki að mér þyki chili ekki gott eða þoli það ekki, mér finnst bara oftast betra að finna meira bragð af matnum en bara chili-bruna).

Þetta er flottur smáréttur til að bera fram t.d. í Júróvisjón-partýum eða saumaklúbbum, eða bara í sunnudagsmatinn þegar mann langar í eitthvað gott en nennir ekki að vera að hafa mikið fyrir matnum.

Þessi uppskrift dugir í aðalrétt fyrir einn eða sem forréttur fyrir 3 til 4.

1 kjúklingabringa
1 lítið bréf beikon
ca. 0,8 dl púðursykur (hellið honum í dl-málið og leyfið honum að síga niður í það undan eigin þunga. Ekki þjappa.)
1/4 tsk cayenne-piparduft (meira eða minna eftir smekk)
1/2 tsk salt
tannstönglar

Smellið á myndina til að stækka hana

Þerrið kjúklingabringuna og skerið niður í ca. 2 cm teninga. Teljið bitana og takið helmingi færri beikonsneiðar en kjúklingabita og skiptið í tvennt. Vefjið einni beikonræmu utan um hvern kjúklingabita og stingið tannstöngli í gegnum bitann til að halda beikoninu á sínum stað.

Blandið saman púðursykrinum, cayenne-piparnum og saltinu. Veltið kjúklinga-beikonbögglunum upp úr blöndunni (það gæti þurft að hjápla blöndunni til að loða við - bara þrýsta létt með puttunum) og raðið þeim á smurðan ofnrekka yfir smurðu ofnfati (t.d. lasagna-fati). Ef einhver sykurblanda er eftir er gott að strá henni jafnt yfir bitana.

Bakið við ca. 175 °C í 30-35 mínútur. Beikonið ætti að vera orðið vel brúnað og stökkt á köntunum og sykurinn bráðnaður.


Athugasemdir:

• Rétturinn stendur einn og óstuddur án sósu eða meðlætis. Ef hann á að vera aðalréttur mæli ég þó með að bera fram með honum tómatbáta og gott brauð (t.d. hvítlauksbrauð), og að draga tannstönglana úr bitunum áður en hann er borinn fram. 
• Ef hann er hafður mjög sterkur er gott að bera fram sýrðan rjóma með honum til að viðkvæmari gestir geti linað sviðann í munninum.
• Ef stækka á réttinn er rétt að bæta við ca. 1/2 dl af púðursykri fyrir hverja kjúklingabringu til viðbótar og smakka sig áfram með cayennpiparinn.

Keeme per Eenda (Nautahakk með eggjum)

Bragðgóður ofnréttur, ættaður frá Pörsum í Maharashtra-ríki á Indlandi.

Fyrir 4.

Innihald:

2 msk ghee eða matarolía
1 stór laukur, fínsaxaður
2 fersk, græn chilialdin (má sleppa ef hrifning á chili er lítil - rétturinn er nógu bragðmikill til að megi sleppa chiliinu)
2 tsk fínsaxaður engifer
-
2 tsk kóríanderduft
1 tsk kúmínduft (cumin)
1 tsk chilliduft (ef vill)
1 tsk kúrkúmaduft (túrmerik, heitir gullinrót á íslensku en fæstir virðast þekkja til þess heitis)
-
750 g lamba- eða nautahakk
-
1 vel þroskaður tómatur, flysjaður* og saxaður
1 1/2 tsk salt
1/2 bolli vatn
-
klípa af sykri (ef tómaturinn er beiskur)
-
1 msk garam masala
1 tsk fínsaxaður ferskur laufkórínader (cilantro)
-
4 egg
-
salt og malaður svartur pipar eftir smekk

*Skerið lítinn kross ofan í hýðið á tómatinum, setjið hann í skál og hellið sjóðandi vatni yfir hann, teljið upp að 10, takið tómatinn upp úr og flysjið. Hýðið ætti að nást auðveldlega af.

Aðferð:
Hitið ghee eða olíu og steikið laukinn, chilialdinin, hvítlaukinn og engiferinn þar til gullinbrúnt. Bætið við malaða kryddinu og hrærsteikið í 1 mínútu, bætið við kjötinu og brúnið það.

Bætið við tómatnum, saltinu og 1/2 bolla af vatni. Bætið við sykri (ef óskað er). Eldið undir loki þar til kjötið er meyrt og næstum allur vökvinn horfinn.

Blandið garam masala og helmingnum af laufkórínadernum saman við kássuna. Jafnið kássunni í smurt eldfast mót, gerið 4 litlar holur í kjötið og setjið hrátt egg í hverja holu. Kryddið eggin með salti og pipar.

Bakið í ofni við ca. 190 °C (180 °C ef ofninn er blástursofn) þar til eggin eru elduð. Stráið afganginum af kóríandernum yfir og berið strax fram, með paratha- eða naanbrauði.

Tilbrigði við réttinn er að stífþeyta eggjahvíturnar, hræra rauðunum saman við og krydda með salti og pipar. Þessu er síðan jafnað yfir kjötið og bakað þar til eggin eru elduð í gegn.

Svínakjöt í rjómasósu

Þetta er eðal-spariréttur réttur sem ég elda af og til. Hann má líka gera með kjúklingi, t.d. lundum eða bringum.

Fyrir 2.

Efni:

• smjör
• 1/2 laukur, skorinn í ca 1/2 cm þykkar sneiðar
• 1 bakki sveppir, skornir í tvennt og sneiddir í ca. 1/2 cm sneiðar
• 2-300 g svínakjöt í bitum, ca. 2 cm þykkum (ég notaði svínalund, skorna í medallíur þegar ég tók myndirnar)
• hveiti
• salt og pipar
• Aromat (má sleppa)
• Töfrakrydd frá Kryddgöldrum
• 1 dl vatn
• 1 dl rjómi

Aðferð:
Blandið salti og kryddi eftir smekk saman við hveiti og veltið kjötinu upp úr því.

Bræðið klípu af smjöri á meðalheitri pönnu og steikið laukinn þar til hann er hálfglær og mjúkur. Takið af pönnunni og geymið. Bræðið væna klípu af smjöri á pönnunni og brúnið sveppina. Takið af pönnunni og geymið (má fara saman við laukinn).

Setjið hveitihjúpað kjötið á pönnuna og brúnið. Bætið við lauk, sveppum og vatni. Látið sjóða í 10-15 mín. eða þar til kjötið er meyrt en ekki orðið þurrt. Bætið við vatni eins og þarf en leyfið vökvanum að sjóða niður og þykkna undir það síðasta (ca. 5 mín.). Bætið við rjómanum og sjóðið í 2-3 mín. til að þykkna aðeins.

Berið fram með soðnum hrísgrjónum eða pasta og fersku salati.

Sæt hrærð egg

Hér er smá tilbreyting frá þessari venjulegu eggjahræru sem maður fær sér stundum með árverðinum (e. brunch).

Fyrir 2:

Efni:
2 egg
4 tsk sykur
1 tsk steikingarolía
1/8 tsk kardimommuduft
2 msk rjómi

olía til steikingar (ef þarf)

2 brauðsneiðar
smjör

Aðferð:
Hrærið eggjum, sykri, 1 tsk af olíu, kardimommum og rjóma saman með gaffli þar til sykurinn er uppleystur. Hitið pönnu við meðalhita (með ögn af steikingarolíu ef þarf) og hrærsteikið eggin þar til þau eru á því stigi sem óskað er (sumir vilja hafa þau svolítið blaut, aðrir vilja hafa þau alveg gegnelduð).

Ristið brauðið og smyrjið og berið fram með eggjahræruna ofan á brauðinu.

Upprunalega uppskriftin er indversk og er þar kölluð Ando Ka Meetha (sæt egg). Í þeirri uppskrift er sykurinn hins vegar mældur í matskeiðum, þannig að þetta verður frekar desert. Í þeirri uppskrift er heldur ekki rjómi, en mér finnst hann gera hræruna mýkri og fallegri á litinn.

Thailenskt karamellu-svínakjöt (Caramel pork)

Þessi uppskrift að gómsætu hrærsteiktu (e. stir-fry) svínakjöti í seigri sósu kemur úr tælensku matreiðslubókinni A Little Taste of Thailand.

Best er að nota wok-pönnu til að matreiða réttinn, en líka má nota djúpa steikarpönnu.

Fyrir 4.


Efni:

• jurtaolía til steikingar
• 3 meðalstórir shallott-laukar (helst rauðir asískir), fínsneiddir

•  6 hvítlauksrif, fínsöxuð

•  500 g svínakjöt, t.d. af hnakka eða læri (ég notaði grísalund), í þunnum sneiðum [kjötið skerst  auðveldlega í þunnar sneiðar ef það er hálf-frosið]

• 1 msk ostrusósa
• 1 msk sojasósa
• 1 msk fisksósa
• 4 msk pálmasykur [hann er yfirleitt seldur í klumpum; til að hann leysist hraðar upp og auðveldara sé að mæla hann er gott að setja hann í þykkan plastpoka og berja hann með kökukefli þar til hann er orðinn laus í sér]
• 1/4 tsk malaður hvítur pipar

Aðferð:
Hellið (eða bræðið, ef notuð er jurtafeiti) ca. 4-5 cm djúpri feiti á pönnu og hitið við meðalhita. Djúpsteikið laukinn þar til hann er ljósbrúnn. Gætið þess að hann brenni ekki. Takið upp úr olíunni með fiskispaða eða gataskeið og látið renna af honum á eldhúspappír.

Hellið olíunni/feitinni af pönnunni, allri nema ca. 2 msk. Hrærsteikið hvítlaukinn þar til hann er ljósbrúnn.



Setjið kjötið á pönnuna og hrærsteikið þar til það er brúnað. Bætið þá við sósunum, sykrinum og piparnum. Eldið áfram í 5 mín. eða þar til sósan hefur þykknað og hjúpar kjötið. Það þarf að hafa góðar gætur á þessu og passa hitann því sósan getur brunnið auðveldlega út af sykrinum ef hún verður of heit.

[Ef illa gengur að fá sósuna til að þykkna og hún virðist ætla að fara að brenna er örþrifaráð að þykkja hana með Maizena-mjöli. Það hefur ekki áhrif á bragðið].

Setjið á disk og stráið steikta lauknum yfir. Gott með soðnum hrísgrjónum.